Veitur leiðrétta vatnsgjöld ársins 2016

16. ágúst 2019 - 13:09

Veitur hafa leiðrétt vatnsgjöld ársins 2016 í kjölfar úrskurðar í vor. Leiðréttingin nær til vatnsveitnanna í Reykjavík, á Akranesi, í Grundarfirði og Stykkishólmi. Í flestum tilvikum gengur leiðréttingin til lækkunar á vatnsgjöldum með gjalddaga nú í september.

Samkvæmt lögum um vatnsveitur sveitarfélaga skal vatnsgjald hverrar vatnsveitu miðast við að það „…standi undir rekstri hennar, þ.m.t. fjármagnskostnaði og fyrirhuguðum stofnkostnaði samkvæmt langtímaáætlun veitunnar.“ Í vor komst samgöngu- og sveitarstjórnarráðuneytið að þeirri niðurstöðu að vatnsgjald á tiltekna íbúð í Reykjavík vegna ársins 2016, sem kært var til ráðuneytisins, hafi verið of hátt. Þótt Veitum þyki úrskurðurinn óljós um sumt var ákveðið að una niðurstöðunni og voru vatnsgjöldin því endurreiknuð með tilliti til hennar. Það leiddi til þess að gjaldið hefur verið leiðrétt hjá öllum viðskiptavinum áðurnefndra vatnsveitna.

Í byrjun árs 2017, þegar áætlun til endurreisnar fjárhagnum var lokið, lækkuðu Veitur vatnsgjaldið víða um 11,2% og aftur um 10% í byrjun árs 2018. Á sama tíma jukust fjárfestingar eftir samdráttarskeiðið í kjölfar Hrunsins.

Viðskiptavinir sem skráð hafa netfang sitt á Mínar síður Veitna hafa fengið tölvupóst með upplýsingum um það með hvaða hætti leiðréttingunni verður háttað. Öðrum hafa verið sendar upplýsingarnar bréfleiðis. Þeir viðskiptavinir sem greiddu vatnsgjald til Veitna á árinu 2016 en gera það ekki lengur eru sérstaklega hvattir til að fara inn á Mínar síður á veitur.is og skrá þar bankaupplýsingar vegna endurgreiðslu.

Heildartekjur vatnsveitna Veitna voru 3,7 milljarðar króna á árinu 2016. Leiðréttingin nú nemur 440 milljónum króna og vaxtagreiðslur 61 milljón króna.

Nánari upplýsingar um tilhögun leiðréttingarinnar er að finna á veitur.is. Smelltu hér til að nálgast þær.