Heitir pottar

Hollráð um heita potta

Við hjá Veitum sjáum um rekstur allnokkurra hitaveitna í vinsælum sumarhúsabyggðum sunnan- og vestanlands. Margir líta á heita pottinn sem punktinn yfir i-ið þegar kemur að þægindum í sumarhúsinu.

Hitaveita eða rafmagn?

Þegar kemur að vali á heitum potti stendur valið á milli þess að kynda hann með rafmagni eða nota hitaveituvatn. Við hvetjum viðskiptavini til að reikna dæmið til enda og bera saman kosti og galla við þessa tvo kosti 

Til að hægt sé að nota sama vatnið í langan tíma þarf að nota allskyns hreinsi- og sóttvarnarefni, viðhafa mælingar um ástand vatnsins og viðeigandi hreinsibúnaður verður að vera til staðar í pottinum.

Helstu kostir rafmagnspotta er að þá er hægt að nota þar sem hitaveitu nýtur ekki við.

Rekstrarkostnaður

Mikilvægt er að hafa í huga að staðsetning og einangrun potta hefur áhrif á rekstrarkostnað. Vel einangraður pottur með góðu loki heldur hitastigi vatnsins stöðugra en illa einangraður pottur sem stendur opinn. Veitur hvetja viðskiptavini að fara sparlega með hitaveituvatnið og setja upp orkusparandi kerfi fyrir heita potta. T.d. má nýta bakvatn frá hitakerfi til að fá grunnvarma fyrir heita potta.

 

  Hitaveita Rafmagn
Fyllt og tæmt eftir eitt skipti 120 kr. 600 kr.
Notkun í einn mánuð 0 - 1.200 kr. (sírennsli)* 5.000 kr. (hringrás um síu)

*Hófstillt rennsli miðað við vatnskaup um mæli. Enginn viðbótarkostnaður ef vatnskaup eru um hemil.

Öryggismál

Mjög mikilvægt er að fólk gæti að öryggi í umgengni á heitum pottum, bæði hvað varðar hitastigið á vatninu og að hafa ætíð lok á honum þegar hann er ekki í notkun. Einnig er mikilvægt að tryggja að lokið sé vel fest hvort sem það er á eða ekki. Mikilvægt er að tryggja að aldrei geti farið fullheitt hitaveituvatn í pottinn.

Lagnir

Við veitum allar nauðsynlegar upplýsingar um hvernig best er að standa að lögnum við bústaði og þeim búnaði sem nauðsynlegur er til að njóta heita vatnsins áhyggjulaus. Hikið ekki við að hafa samband ef sumarhús þitt er á þjónustusvæði okkar.